حدوته - ديوان دائرة العشق

حدوتــــه

حدوته .. ح احكيها
ومش ح تنتهى
بطلوع النهار
مهياش خيال
ولاهياش أحلام
لا .. دى مشوار
بطلها كان
فاكر نفسه
شاطر الشطار
عشان حب بنوته
والحق يتقال
خدودها نوار
قال بس .. لقتها
وهى دى
ح تكون لى مطار
ولكن يا عينى
بصت له وقالت
دا لعب صغار
يومها قلبه جرى
فى ضلوعه يصرخ
وآيد نار
يا خسارة .. ماحبتهوش
عيط له يومين وقال
يا نارى يا نار
إمتى يطير
من على عنيها
وقلبها العفار
عشان تشوفنى
اللى خلت عنيا
دموعها أنهار
.....
دى حته
مش كل الحدوته
دا لسه الأسرار
.....
بعديها قابلته بنوته
طيبة وعلى نياتها
زى الصغار
ققالت له بحبك
قالها وأنا كمان
كأنه قمار
خسر دى .. يبقى
لازم يكسب دى
ولكن الجدار
اللى بين قلبه
وحبه ليها
الحب المستعار
يعمل إيه
يروح فين
عاش محتار
وسابها للظروف
يتصالحوا .. يتخاصموا
الاتنين خيار
كان يضحك لها
وضميره من جوه
ساقيه المرار
يا كداب .. يا خاين
ذنبها إيه .. سيبها
وخاف الستار
وفعلاً سابها
زى القميص
ما يسيب الزرار
يا خسارة .. ما حبهاش
وقال دى شوية
تفاريح وهزار
.....
ودى كمان حته
من كل الحدوته
ولسه الأسرار
.....
شاف بنوته
قلبه فى ساعتها
طق شرار
والعين فرحت
غنت وقالت
يادى الأنوار
الحارس الله
صاينك وحاميك
من كل بتار
وراح بعدها
يطلب ودها
ولكن الأقدار
حلفت تعذبه
تكويه ..
تعيشه دوار
البنوته إدللت
وعليه إدلعت
وفى عز النهار
ورته النجوم
القمر
ودموعه أمطار
بيحبها .. ما بيحبهاش
صحيح !
القلوب أسرار
.....
ولغاية دلوقتى
ما يعرفشى
ايه القرار
ولا إحنا عارفين
إيه آخرة حدوته
شاطر الشطار